德甲歇冬，效力多蒙特嘅日本中場香川真司最近就回祖國過聖誕，亦不忘喺社交網絡放相同短片update近況。繼一日前上載一段瞓喺地下、笑住舉BB當舉重嘅得意短片，得到成9,000幾個like後，今日佢又搵細路嚟練習。
今次呢段短片係香川喺球場上，同個估計只得5至6歲嘅細路玩波，但過程中得佢玩得開心，而呢位細路就不斷畀佢又左又右咁通坑渠，用盡方法連瞓地鏟都出埋，都係攞唔到香川個波。
不過，細路最後一個方法，終於令到香川停低，就係企喺度狂喊，搞到香川尷尷尬尬知自己出事，即刻笑住走上前安慰，仲抱個細路去踢番個波，點知畀佢hurt到嘅細路唔領情，一腳踢走個波，之後就對住場外估計係佢嘅父母狂喊，相信佢個父母應該係香川啲老友。
香川放呢段片上去時幽默咁寫：「呢次失意只會令人變得更強。」仲tag埋「練習」、「友情」以及「之後和解」等詞。好多日本球迷睇完套片，仲留言話如果自己可以畀香川通坑渠，都唔知幾榮幸喎！