行山打卡成為風潮，每逢假日，大東山亦是另一座「MK山」！90後美少女Gasha三年前亦成為山系型女，每周行山一次，更設立fb網頁，上載行山靚相，吸引近二萬like，不過Gasha自覺與時下「打卡男女」純呃like有些分別，起碼為行山特意報讀山藝課程，每次路線都仔細規劃，帶齊裝備及充足糧水，且告誡自己「行山絕不逞強」。
山上喜見低頭族抬頭
「個個都行山，唔通個個都鍾意行山咩？」Gasha笑言三年前初次接觸行山毫無樂趣可言，每當男友着她一起行山，內心總是一萬個不願意，「反而分手後，有一次同朋友去西貢海下，望住眼前美景有叮一聲感覺。」從前放假只想宅在家，至今每周例必行山一次，全因大自然的景觀改變了她。
街上平日盡是低頭族，令城市變得冷漠，但回歸大自然後，Gasha感受到山野充滿人情味，「假日平日上山，見到前前後後無論是香港人、內地人或外國人，大家迎面行都會講聲早晨，而且唔會拎住部電話，我覺得城市應該係咁。」雖然她坦言每次上山都愛搵靚位打卡，但做足準備才是重點：「每一次行山都會plan起點，點樣搭車去、在中途邊啲位有補給點、邊啲係撤退位置、終點及撤退位置相隔幾多？」有次她挑戰「杯靈雙渡」，但途中失了預算，決定撤退，「個天已經黑，同行有個前輩唔建議我哋繼續行，行山真係唔可以高估自己。」