利迷收聖誕禮物喇！英超球會利物浦周三證實，已經同修咸頓達成協議，冬季轉會窗重開後，就會簽入荷蘭中堅華基爾雲迪積克。利物浦亦喺官網放咗張雲迪積克企喺聖誕樹前，手執紅軍波衫嘅相。雖然紅軍冇透露轉會費，但包括《BBC》在內嘅各大英媒，都表示轉會費係破後衞轉會費世界紀錄嘅7,500萬鎊（約7.8億港元），令呢位26歲嘅荷蘭國腳頓時成為全球最高身價守將。
18萬鎊周薪打動棄藍月
早喺今年夏天，利物浦已經開始苦苦追雲迪積克，不過就俾修咸頓投訴佢哋違規接觸球員。前一兩個禮拜，又有傳今季奪冠機會高唱入雲嘅曼城，因為防線出現多名傷兵，主帥哥迪奧拿表明要買後衞，可能會加入戰團。不過，雲迪積克最後選擇做紅軍，英國傳媒《每日鏡報》就話係因為領隊高路普嘅誠意打動雲迪積克，令佢決定棄曼投利咁話。誠意夠當然銀彈亦不可少，據報雲迪積克加盟紅軍，周薪有至少18萬鎊（約187萬港元）。
不過，有趣嘅係，利物浦似乎好鍾情效力過修咸頓嘅球員，因為自英超成立後，就一共有八名球員由聖人轉投紅軍。當中包括早年嘅守門員保羅鍾斯、前鋒高治。到14/15年球季，時任領隊羅渣士一個夏天就買入咗列基林拔，拉爾拉拿同洛夫雲，之後到冬季就買入埋英格蘭右閘尼達利基尼。到現任領隊高路普上任後，喺16年夏季買入咗翼鋒沙迪奧文尼，加埋日內加盟嘅雲迪積克。紅軍多年來向聖人進貢咗差唔多1.7億鎊（約18億港元），而修咸頓亦成為左利物浦最堅實嘅人才供應商。不過，敢破紀錄買中堅，紅軍唔係冇計數，有傳菲臘比古天奴離隊在即，經理人下月三日就會同巴塞隆拿會面傾數，據講轉會費肯定過1.25億鎊（約13.1億港元），所以紅軍有可能係先使住未來錢。
法明奴士哥獎金和味
另外，雲迪積克未來嘅利物浦隊友，巴西前鋒羅拔圖法明奴最近就被爆出佢嘅入波獎金非常和味。據報法明奴每入一球都有獎金，每射入五球，獎金又會漲一漲。上仗對史雲斯，法明奴梅開二度射入佢今季第15同16球。按獎金機制，佢一場就袋走15萬鎊（約157萬港元），係佢六萬鎊（約63萬港元）周薪嘅兩倍幾，認真開心。