老友記叫左丁山開解佢個乖女靚女M，唔好為公司削花紅一事傷心，都不知如何說起。左丁山一代，做商業銀行時根本無花紅可言，頂多出多一個月糧，即14個月糧，嗰陣時之商業銀行認為出花紅會鼓勵前線僱員冒險，做貸款會比較鬆手，容易導致銀行有壞賬損失，故此左丁山做貸款主任，貸款經理，年年有表現兼超標，斗零花紅都未收過。及後轉往商人銀行（現稱投資銀行），居然有利潤分享（profit sharing）呢回事，紐約總部講明，香港分公司每年利潤可有最高達到兩成，分畀香港員工，嘩，即刻搏命做，一個月飛兩三次東南亞搵生意。唉，點知遇上九七談判風潮，佳寧風暴，香港市道不景，東南亞生意做埋唔夠香港蝕皮，年尾計數，利潤雞碎咁多，分兩成都冇用。呢啲叫做時也命也，冇得好講，那似得後輩在2018之前幾年，每年分花紅可以夠首期買樓，一位校友嘅公子就因為咁可以上車──買咗擎天半島一個單位，𠵱家恨死佢啲同學。2018至2019，炒魷魚就有份，花紅免談，此之謂時運。同靚女M講時運，講左丁山人生經驗，佢似明似唔明，算了吧，人都未夠30歲，唔好心急啦，以後還有機會嘅，但靚女M話有啲心灰，可能新年過後，搵工跳槽，左丁山叫佢諗清楚先，除非有好好offer，間間金融機構都係一樣嘅啫，做熟咗班客，叫佢哋落單都容易啲，去到新環境，人哋希望你帶啲熟客過檔，你有冇把握先？Call新客即係從頭嚟過，工作更辛苦㗎。靚女M為之默然，睇佢眉頭眼額都係唔順氣嘅咯。
向老友交差，打電話畀佢：「喂，我講完㗎嘞，你同個乖女去吓布吉島曬吓太陽啦！」跟住走去灣仔滿福樓吃午飯，老友R請客，算係一年一度聖誕大餐，滿福樓啲點心又幾正斗，於是係咁叫，腸粉、芝麻雞好好食，於是叫夥計攞餐牌睇吓價錢，原來都幾貴，比陸羽點心價錢高出三至四成，真係食親老友R嘅荷包，唔係幾好意思！小菜亦貴，於是只叫兩三碟就再叫肉絲炒麵乾炒牛河，牛河還可以，炒麵就失準，埋單四千幾蚊，係我哋肉痛嘅啫，人哋生意都唔知幾好，不少講普通話高端客人係咁食，目測幾張餐枱，廚餘大把！再講落去我哋幾容易變成低端人客，不受歡迎嘅嘞。江山代有人才出，新興菜館如滿福樓、China Tang、都爹利會館都價錢昂貴而生意不愁，食客以富豪級、強國人、富二代、金融界才俊為主，左丁山呢類人漸受淘汰！