餐廳午市後落場，閒置嘅廚房無用武之地，社企共廚家作就撮合6間願意借出閒置廚房嘅餐廳同10幾名基層婦女，等佢哋用閒置廚房炮製美食，產品會放喺餐廳賣或由餐廳直接入貨，部份基層婦女因而每月賺取5、6千蚊收入。
共廚家作營運總監張晉銘話，飲食業門檻高，基層婦女難以自行開業，因此利用餐廳嘅空閒時段。佢哋去年4月獲社創基金資助80萬，由最初同餐廳合作，改由婦女直接喺工場下廚，產品收入三成歸食材、四成為薪金、三成為餐廳及社企營運收入。
向長沙灣泰餐館提供蘋果梨子茶嘅基層婦女林蓮英指，果茶係佢家鄉福建嘅名物，冇諗過以往煲畀家人飲嘅果茶可以賺錢，𠵱家每周花一至兩日煲茶，工作模式適合佢照顧一家大細。而每周購入64支果茶嘅餐館負責人林奕峯，就大讚果茶獲客人垂青。