德甲上周正式進入歇冬期，要數到半季最令人失望嘅德甲強隊，肯定非多蒙特莫屬。蜜蜂兵團今季請嚟前阿積士領隊保斯執教，曾經歷聯賽六勝一和嘅蜜月期，點知之後一沉不起，喺魯爾區打吡領先四球都可以輸番畀宿敵史浩克四球，又曾經鬧出當家射手奧巴美揚遲到等紀律問題，睇嚟蜜蜂兵團想谷底反彈，首先要解決好內部問題。
其實蜜蜂兵團都經歷唔少大起大跌，想當年曾經爆大冷，喺96/97年嘅歐聯擊敗當時擁有法國球皇施丹嘅祖雲達斯，其後更大手買入阿武羅素、真高拿等球員，導致球會入不敷支幾乎破產、降班；後嚟球隊係高路普嘅帶領下重回正軌，更加喺10/11同11/12球季兩奪德甲，可惜球隊始終做唔到拜仁咁穩定，14/15球季歇冬期前更位列榜尾，好彩最尾都護級成功。
從以上嘅歷史所見，多蒙特名副其實係一支大起大跌嘅球隊，當踢出氣勢可劍指冠軍，一旦連敗陷入危機，球隊反彈似乎十分吃力。德國名宿馬圖斯就指出，當多蒙特陷入危機時，場上欠缺領袖帶領球隊奮戰。觀乎目前多蒙特嘅陣容，當家射手奧巴美揚存紀律問題，馬高列奧斯、馬里奧葛斯傷多過踢，舒姆沙、香川真司等人亦唔係剛烈嘅領軍將才，前主帥保斯又冇好似高路普、杜曹等經常激勵球員，導致原本有力挑戰季初面臨動盪嘅霸主拜仁，變成目前落後13分之多。
目前多蒙特表面上球星雲集，但實際上予人各自為政之感，加上近年經常有當家球星出走，奧巴美揚亦傳出希望離隊，打擊球隊士氣；點樣團結激勵呢班比上不足、比下有餘嘅蜜蜂戰將，將成為新帥史托加下半季嘅重大考驗。
文：尊嘉