今季三大上位灰馬，肯定是「五十五十」、「平湖之星」及「旺蝦王」，佢哋愈跑愈勁，季內合共已贏11場頭馬，灰色神獸之名就不脛而走，深受馬迷愛戴。
其實灰色神獸又何止上述三匹，追溯到以往灰色佳駟，數都有排數，八九十年代出現過之「祿怡」、「及時而出」肯定係灰獸鼻祖，還有兩屆香港盃冠軍「加州萬里」。而其實現役最高分灰馬(115分)「大印銀紙」，亦非常厲害。
隸屬告東尼馬房之「大印銀紙」既是2015年香港一哩錦標亞軍，該場只不敵日本馬王「滿樂時」而跑贏「步步友」，亦是2016年董事盃冠軍，但可惜「大印銀紙」之後一直低沉，因此今季風頭才被「五十五十」、「平湖之星」及「旺蝦王」搶晒。
不過，「大印銀紙」上仗出爭一班千四米，負重磅下跑得一席季軍，輸給兩匹輕磅馬不足一馬位，明顯大有起色，「大印銀紙」將由布達德執韁角逐元旦日重頭戲國際三級賽1400米華商會盃，同場撞啱另一灰獸「五十五十」，以「大印銀紙」級數，一旦全面復勇，負122磅讓「五十五十」9磅，未必讓唔起也。