前特首董建華有「Seven Eleven」（朝7晚11）的外號，工作時間超長，現任特首林鄭月娥不遑多樣，佢喺商台節目訪問話每日除咗瞓覺，其餘時間都係工作，為《施政報告》趕工前兩星期，每日只瞓到3、4小時，家陣亦只能每日瞓5小時，加上頻頻外訪，有時要搭凌晨3點嘅航班，即使可以喺飛機瞓覺，睡眠質素都欠佳，但林鄭話做特首唔應該畀人「好頹」感覺，當自己過得攰到「眼睛都擘唔大」，會減少工作。
林鄭透露自己有少少血壓高，須服藥控制並定期體檢，佢話行程太忙，無時間做運動，平日只可以拉筋或喺花園散步，曾稱愛打羽毛球嘅林鄭仲笑指自己「半年冇拎起個拍」。
話唔介意fb有嬲嬲
競選期間被揶揄唔識用facebook，如今已設立fb專頁嘅林鄭卻稱「其實好容易之嘛」，佢話fb專頁只係每日寫下一啲感受，仲自爆曾建議喺《施政報告》發表後做fb直播，但同事反而有保留，自言唔介意fb有嬲嬲、負面甚至粗言穢語留言，因為選舉期間都有出現過，會保持平常心。佢話近幾年學懂放下，例如自小老師、校長都覺得佢「叻」，令佢積累唔少壓力，但家陣外界嘅評價已經影響唔到佢，自問係為社會做事而非為取悅某一個人，只要問心無愧就得。
李八方