由於拜仁慕尼黑一隊獨大，多蒙特同埋史浩克04皆冇力爭冠，令到近年嘅魯爾區打吡無咩睇頭，可以講係褪色大戰。受惠於RB萊比錫表現反覆，加上死敵多蒙特失常，史浩克唔經唔覺已經升咗上聯賽第二，以30分成為德甲半程亞軍，但仍然落後榜首嘅拜仁11分。值得一提嘅係，史浩克係自德甲改行三分制以嚟，最低分嘅半程亞軍，打破利華古遜喺00/01球季保持嘅紀錄，當時利華得31分。
其實史浩克就好似英超嘅利物浦咁，曾經風光過，之前贏過七屆德甲冠軍同五屆德國盃，只係對上一次攞德甲已經要數到1958年。而且該隊近三季表現都浮浮沉沉，上季更加只排第10一度要打護級，所以今年做到半程亞軍已經收貨。
論財力同魅力，史浩克更加唔係多仔、拜仁嗰班，甚至萊比錫都比唔上。佢哋今個夏天只係簽咗熱刺棄將賓達納同埋烏克蘭翼鋒高路比恩卡，前者有傷在身德甲只上陣六場，後者表現一般只得一個入球。好彩嘅係原有班底發揮出水準，哥列斯卡喺中場助攻助守，前鋒古多貝斯托拿雖然個人技術一般但勝在勤力走位強，目前以七個入球成為球隊神射手。
最令人驚喜嘅就梗係35歲嘅巴西中堅拿杜，佢今季攻入嗰三球極之關鍵，九月主場對史特加射入一球助球隊超前；月中作客法蘭克福更加喺補時入波，令史浩克以2:2追和。最經典嘅一次當然要數11月尾嘅打吡戰，史浩克當時以3:4落後，拿杜又喺補時入波令史浩克追成4:4完場，真係可以講係越老越可愛。
不過史浩克始終缺乏穩定性，往往失球之後先如夢初醒急起直追，如果可以改善呢個缺點，佢哋今季應該可以走得更遠！
文：聰鳴