有意參與明年3月港島區補選嘅香港眾志常委周庭，今個聖誕唔再宅，佢孖住被DQ嘅立法會前議員羅冠聰，喺聖誕節當日於一個社區活動上開金口，除咗一齊合唱傳統聖誕歌《Jingle Bell》同Dear Jane《哪裏只得我共你》之外，兩人仲各自獨唱方皓玟嘅《你是你本身的傳奇》同Beyond嘅《18》，希望同年輕人分享追夢嘅掙扎。
聰聰唱年輕人成長掙扎
周庭噚日喺電台節目話今個聖誕好難忘，因為佢以往都因為怕人多同消費貴，通常都留喺屋企一個人上網過聖誕，今年係第一次聖誕夜有活動，透露香港眾志幾個年輕人聖誕節出席一個社區活動，首次以眾志名義出隊busking，周庭先獨唱方皓玟嘅《你是你本身的傳奇》，聰聰就唱咗Beyond嘅《18》。點解揀呢兩首歌？聰聰話兩首歌都係講成長嘅困惑，以及年輕人喺理想同現實之間嘅掙扎。
雖然唱歌唔係佢哋本行，周庭又帶病上陣，但佢兩個都唱到有板有眼，更加獲得台下唔少掌聲，噚日仲喺節目中應主持人邀請開金口唱咗兩嘴。周庭自爆係第一次喺睡房、浴室、卡啦OK以外嘅地方唱歌，難怪呢個聖誕咁難忘！
至於香港眾志秘書長黃之鋒就話自己好慶幸，以為聖誕、除夕會因為佔旺案而要喺監獄過，點知聖誕可以出返嚟，同屋企人、身邊嘅人過節，都覺得好開心，而聖誕節主要休息一下、食吓嘢同打吓機。
李八方