十二月中某日，午飯後行經IFC商場嘅Robuchon茶點麵包店，見到世姪女M買蛋糕，買咗半打Lemon Chestnut，於是叫佢一聲，靚女M回頭一笑：「Uncle，食唔食蛋糕呀？」左丁山問：「呢度有幾款，邊款最好食？」靚女M話：「咪係Lemon Chestnut囉，其他我都食過，芒果就一般啫。」咁識食，都要負擔得起至得，成52元一件，買半打就要312元，靚女M就幾豪噃，唔通人工好好？靚女M為人醒目到極，否則在金融機構服務，點會年年升級呀，佢一見左丁山面色，立即解答疑團：「Uncle，我唔係時時嚟買㗎，頂多半個月買一件，食勻晒始發覺係Lemon Chestnut最有鮮味。我今日買半打，係孝敬阿媽阿爸，帶番屋企一齊食啫。」
做乖女必有因由，問佢係唔係加咗人工，靚女M笑得開心：「加人工係有，唔多啦，但今年我地做產品銷售破去年紀錄，佣金收入在十月中已經跑夠數，阿哥（Team Leader）在11月中就叫我地可以慢番少少，否則2018嘅KPI又會俾上頭大幅度增加。阿哥話今年花紅應該好好，有快樂聖誕喎！」
唔怪得咁開心，做金融產品銷售，坦白講，人工唔會比其他職員高得多，最重要係所謂meet target，跑數爆燈，等年尾分花紅分到笑唔埋嘴，如果冇花紅分，你做咯，邊度有工作積極性。
做冬之日，又在電車路碰到靚女M，好似冇厘神氣咁，面口唔同晒，打完招呼之後，左丁山多口問佢分紅有着落未，靚女M幾乎想喊：「Uncle，好慘呀，阿哥前日被大老闆召見，通知佢今年花紅會削減，仲少過舊年，原因係有其他部門蒙受壞賬損失，令公司綜合計數，利潤增長變成單位數字，咪要削減我地花紅囉。好唔公道呀。我地條team做得咁好，都係得個桔，我幾乎想話換咗部舊車買新車，好彩仲未落實啫！」唉，世事難料，一場歡喜一場空，靚女M上咗一課。晚上返到屋企，靚女M阿媽打電話嚟：「喂，唔該你得閒在中環搵阿M飲杯茶，佢今日無食過飯，講起花紅，突然流眼淚，好激氣咁。你咁有經驗，開解吓佢啦，屋企又唔係等佢分花紅開飯！」吓，當左丁山係輔導員？喺大集團做事就係咁嘅咯，左丁山見得多，集團業績遜預期，CEO要向董事會交代，梗係例牌叫員工共渡時艱嘅啦，佢嘅飯碗緊要過職員嘅花紅呀！