趁放聖誕假，八方噚日就行吓灣仔會展嘅冬日美食節。有展商話今年銷情好咗，噚日仲趁假期最後一日開始減價促銷。
「珍姐台灣風味黑毛豬臘腸」負責人關女士話，天氣凍多咗客仔買臘味，展期中段已經補咗一次貨，噚日起全部貨品減價5%，最平由原價79蚊一斤減到70蚊，預告今天再割價促銷。
壽桃集團就向入場人士大派鳳凰卷、杏仁餅谷人氣，負責派贈品嘅員工劉先生一出動就俾女圍，一人一手瘋搶戰利品。市場助理吳小姐話，展期每日營業額平均有30萬元，估計利潤會多過上年。
從事運輸業嘅陳先生專誠去買餸，一共使咗700蚊，主要買海鮮、急凍和牛同蟹肉等。孫女士就花咗千幾蚊，話100蚊買咗3罐鮑魚好抵。