相信好多球迷都記得，德國球星馬里奧葛斯有個超索女友，佢就係名模Ann-Kathrin Brommel。由於葛斯足踝有傷，所以提早放假過年，聖誕佢就同女友開開心心食大餐。葛斯就將啲相po咗上ig，而從相中見到，阿Ann左手多咗隻戒指，唔通係想話畀人知兩個好事近？
船P曾「動L」 女友騷鑽戒
阿Ann擁有天使面孔魔鬼身材，著名男性雜誌《FHM》嘅南美版就試過將佢評為年度女郎，而27歲嘅佢自從2012年同葛斯拍拖以嚟，兩個感情一直好好，2014巴西世盃決賽，葛斯幫德國射入致勝球之後，亦有喺球場上同女友錫錫。至於阿Ann平時除咗會擺自己啲靚相上社交網站，仲會晒吓同葛斯嘅恩愛相，葡萄死人。不過，數兩人最出名嘅一幕，又點可以唔提2014年兩個一齊去船P嗰時，或者因為女友身穿比堅尼意態撩人，葛斯就俾記者影到「動L」，令到家陣佢兩個每次出海都會成為追訪焦點。
講番葛斯，前幾年佢加盟拜仁，係歷來轉會費最高嘅德國球員，但轉會後水準反覆，最後仲被拜仁放棄，難得母會多蒙特不計前嫌，上季買佢返嚟。但今年初隊醫診斷出佢有代謝疾病，所以要停止訓練，接受治療。佢今季復出後，雖然都得前教練保斯睇重，但表現始終唔可以同高𥧌時比喇，而且仲好似脹咗成個碼咁，不過靚女友始終不離不棄，家陣仲可能做埋老襯，都值得開心嘅！除咗同女友happy外，葛斯放假亦都去咗打網球，但佢出名係「傷追人」，希望唔好因為打網球又整親啦。
奇雲查普攬女晒肌
另外，效力緊聖日耳門嘅德國門將奇雲查普亦俾記者影到佢同索爆女友，家陣33歲、曾經為Victoria's Secret等大牌行騷嘅巴西名模Izabel Goulart，一齊喺巴西度假，過一個充滿陽光與海灘嘅聖誕。相中見到佢哋喺沙灘又拖手又攬又錫，希望令今季喺巴黎坐多過踢嘅查普有番啲歡樂啦！
