權威醫學期刊《新英倫醫學雜誌》（NEJM）選出10篇「2017年度最受矚目研究文章」，當中兩份來自中大醫學院，亦係全亞洲僅有入選嘅研究文章。兩個研究都同癌症有關，其一係由著名港產科學家、中大醫學院化學病理學系系主任盧煜明，同化學病理學系教授陳君賜領導，證實分析血漿內EB病毒DNA，可在未有病徵前及早診斷出鼻咽癌，簡單講就係驗血就知有冇鼻咽癌。
另一份獲選研究由靚仔醫生、腫瘤學系系主任莫樹錦領導，研究證實帶有表皮生長因子受體（EGFR）基因變異的肺腺癌患者，接受一線標靶治療仍然惡化，再發現有基因突變同抗藥性，就可透過新治療模式，將癌症無惡化存活期延長超過一倍。要喺NEJM出paper一啲都唔易，NEJM每年平均收到5,000份研究論文，最終只會刊登當中5%最優秀文章，今次全年10大最好論文中香港醫學界佔兩位，認真威威！