今年登上特首寶座嘅林鄭月娥，佢嘅衣着可能都值得回顧，林鄭曾經穿上紅噹噹嘅透視連身裙配黑絲加對黑色高踭鞋、斜揹小手袋出席電影首映，成功吸睛。林鄭日前接受港台訪問時透露，扮靚都係為公務，話自己平日好「哩啡」，搞個人形象工程令佢覺得好煩，上任後有3件衫搵專人設計，但佢寧花心神喺工作上，對佢嚟講生活就係工作。
「我係禮賓府過客」
林鄭日前喺港台訪問中講到何解佢出席唔同活動時頻頻換衫，佢以「唉」一聲解釋其實有原因，話自己擔任香港首位女特首，加上講過話要推廣創意產業，所以要着重平日嘅服飾，希望畀人睇到香港嘅首長着衫有設計，反映香港設計水平唔差。
林鄭話，上任半年搵人設計過3套服飾，第一次係7.1宣誓儀式時嗰套，另一套係出訪英國時嗰套孔雀藍紡紗旗袍，第3套係佢出席越南峴港APEC會議時帶有越南風嘅旗袍，但由於APEC各領導人要穿上大會指定嘅服飾合照，令呢件衫被遮住，「好衰唔衰有套制服，我認為（那件旗袍）做得非常之好」。
但林鄭覺得搞個人形象好煩，「啲人以為我有服裝設計，有跟班，乜都冇，我自己一腳踢」。有冇諗過請人代勞？林鄭即時話想親力親為，又話佢嘅生活就係工作，「如果我睇少啲電視、去少啲街，我可以諗多啲橋，或者做吓嘢，咁咪幾好，𠵱家基本上係冇私人生活」。佢話從冇將自己當做禮賓府女主人，「我係一個住客，或一個過客」。
李八方