今年23歲嘅中大學生會前會長張秀賢（Tommy），原來細個時已經係「巴膠」，最開心係考試高分，獲家人送玩具巴士做禮物。年紀輕輕嘅佢，原來仲有一個「特異功能」，就係可以背晒全香港嘅巴士路線，只要問佢巴士編號，佢就能講出路線起點同終點，八方親身考過佢，發覺佢真係答得出！
譚凱邦係政治啟蒙老師
自細喺屯門安定邨長大嘅張秀賢，小學時就讀順德聯誼總會胡少渠紀念小學，中學就讀順德聯誼總會梁銶琚中學，張秀賢自細已有音樂天份，小學喺家人鼓勵下學小提琴，中學更入埋中樂團，連二胡都識拉，笑指自己最叻係唱歌唔會走音，所以台上帶唱「今天我」（《海闊天空》）都難佢唔到。
曾加入過學民思潮及中大學生會，致力為學生爭取權益嘅張秀賢，原來早喺中學時代已就校政問題發聲，試過就canteen食物同校內加裝閉路電視等議題同校長理論，難怪唔少老師當年已話佢適合搞政治、選議員。張秀賢由中一開始，更遇到佢嘅政治啟蒙老師，就係現時新東民主派初選對手范國威黨友、新民主同盟譚凱邦！
張秀賢話，譚凱邦由中一教到佢中六，除咗教佢科學同生物，亦令佢認識乜嘢叫政治，投身反屏風樓、反高鐵等社會運動，2008年仲幫喺立法會九龍西選區出戰嘅譚凱邦助選拉票。現時雖然同老師嘅黨友范國威喺民主派初選爭逐新東補選出線權，但大家仍然有傾有講，無損感情。
