每年一月一日，現役所有北半球馬會自動增加一歲，換言之呢日將係好多馬匹轉歲嘅日子。
對本周三晚(27日)快活谷第八場二班1650米告東尼馬房的「加州議長」來說，目前仍屬四歲馬身份，但跑完本周三夜賽，下仗再出就變五歲，屆時就會喪失爭取「優異成績特別獎金」的資格，換言之今仗是最後機會。
根據規定，任何不低於80分的賽駒，年屆5歲前首度在二班勝出，就可額外獲75萬元獎金，四歲的「加州議長」在北半球美國出生，以往只贏過一場三班賽，若今場於二班贏馬，除了頭馬獎金1,060,200元外，馬主梁羅澄容還可額外袋多75萬「優異成績特別獎金」，合共逾180萬，真正年尾出花紅。但若今仗不勝，下仗以五歲身份贏二班賽，已不合資格領取那75萬，所以今次最後餐士，唔砌盡勢係假。
「加州議長」上季曾與「西方快車」串Ｑ，「西方快車」最近在一級賽香港一哩錦標亦得亞軍，由此推斷，「加州議長」在二班冇可能是下風馬，加上今次配巫顯東只負116磅及排2檔，轉戰谷草對手亦較弱，更堪稱是黃金機會。