公司舉行聖誕大食會，同事夾錢買食物，客戶贊助飲品，左丁山只屬客卿身份，應邀參加，後來覺得手空空帶梳蕉去食一餐，唔係幾好意思，於是在租庇利街金華訂咗兩隻燒鵝、三斤叉燒、三斤燒肉，叫金華送上公司。點知到咗中午十二點，行到金華找數之時，夥計話：「送咗貨嘞，即刻有人畀晒錢！」吓，咁咪係白食？急急腳走上去，只見二十幾、三十人已經開始飲食，左丁山問一位主持人：「金華燒肉叉燒邊個找咗數？」主持人話：「唔知喎，我哋有個大食基金，還有盈餘，唔使你出錢嘞。」
於是又有免費午餐，是日主要食物供應來自一間於12月24日在青衣城二期開幕嘅餐廳，主理人係分子廚魔嘅舊拍檔，呢日送來特色炮製牛筋腩咖喱、蔬菜草菇意大利飯、熱狗、炸魚蛋等等，皆別有風味，畢竟主理人出身於米芝蓮三星餐廳，知道如何吸引食客嘅，他日有空，去青衣城二期商場食番餐都好。
至於輔助性嘅金華叉燒燒肉，就非常搶手，一掃而空，客人食慣好嘢，正是入口便知龍與鳳，唔會食錯嘅，連一向揀飲擇食，午餐麵包要到IFC嘅Robuchon食嘅靚太T，口口聲聲話要減肥，見到啲燒肉叉燒，都立即除低身上名貴大褸，用叉篤番兩件肥叉燒。
在場者有不少財經評論員，亦有市場外滙策略師，一位經驗豐富，在「時喜雷曼」辦公室設於PPI（太古廣場一期）年代，已經入行，佢話現在科技有大突破，電腦逐漸代替人腦落盤，佢哋現在就已經應用AI操盤炒外滙，左丁山嘆一聲：「AI當道，human收檔了。」呢位仁兄話：「無辦法啦，大勢如此。」於是記起前一日在上海總會食午飯，電腦J嘅一位老友提出，想在社交網站上載佢個人感言，希望得到回應，甚麼感言呢？佢話：「AI成為潮流，勢不可擋，大量基層工作被代替，中國大陸自言科技先進，有無人碼頭、無人貨倉、無人超市、無人入油站等等，於是各方稱讚，但我諗到嘅係一啲低教育群眾，如搬運工人、售貨員、收銀員、服務員，全部冇工做嘅話，失業大軍人數會上升，馬克思所講之reserve army of labour出現，正是共產主義之起點，但中國已係共產先進國，點搞？我想搞AI要有人文的考慮，有一個Human Charter，說明AI進步不能完全搶去基層飯碗，中高層飯碗……」唉，呢個係一個高深哲學題目，非一朝一夕可以解決，現在內地有低端人口一個名詞，在不久之將來，所有外滙交易員都會成為低端人口，我哋點算好？