向來好打得嘅特首林鄭月娥，終於肯喺聖誕假放假五天，交畀政務司司長張建宗留守添馬艦！繼前日娥特喺facebook po咗全家搭高鐵去桂林休假嘅短片後，噚日佢再po溫馨全家福，包括少有出鏡、喺外國讀書嘅細仔林約希，一家四口同遊桂林蘆笛岩，相中嘅林鄭仲好似小女人咁，蹺住老公林兆波同大仔林節思嘅手。林鄭喺fb留言，話此行驚嘆「洞奇」、「石美」嘅景觀，但更難得係可以享受天倫之樂。
林鄭同時亦喺fb上載短片，話今年係佢同屋企人喺禮賓府過嘅首個聖誕節，好開心囝囝分別由北京同美國趕返嚟參加特首辦嘅party，但對出席嘅律政司司長袁國強嚟講，就相信係任內最後一次嘞！