在灣仔長大的劉榮業早在12歲已加入愉園青年軍，16歲入選香港青年軍，由於身材矮細，踢法靈活多變，有蠱惑仔及老鼠仔的綽號，而他透露，現在只有與他同期出道的曾志偉仍叫他蠱惑仔。
劉榮業透露，與曾志偉於71至73年期間一同代香港青年軍，當年貪玩，又細粒，像隻老鼠，故有老鼠仔的別名，至於蠱惑仔則是踢法多變有關，他說：「我同志偉同期代表香港青年軍出賽，但我哋身份完全唔同，操練我坐巴士去，佢就坐BENZ到場，佢飲雞湯，我飲例湯，大家去馬鞍山操練，佢操練後有工人帶飯畀佢，我就要排隊食飯堂，故經講笑咁講，大家咁高咁大，好唔公平，現在同志偉仍係好朋友，只有佢仍叫我做蠱惑仔，其餘已叫阿仔。」
問到為何出道至今只效力愉園時，他表示，愉園好願意栽培年輕球員，既有宿舍、又聘請教師教球員，又有名將在陣便踢到掛靴。他說：「當年左派球會唔受歡迎，試過有隊友喺青年賽事後被警察球員追打，當年左派喺社會上好乞人憎，我哋喺球場上串啲，出到球場就會畀人打。」
72/73球季，劉榮業獲升上愉園甲組，初出道不久便獲當年由陳瑤琴做班主的加山向他招手，但當時愉園有張子岱及鍾楚維名將，有大樹遮陰下便決定留隊，他說：「張子岱斬波好準，只要跑便可以拎到波，與胡國雄靠技術扭波好唔同；鍾楚維當打，愉園有呢幾枝大炮，便留喺愉園學嘢，之後踢到掛靴。」
記者：曾雁平