第三場新馬錦標無疑係今日（23日）重頭戲，然而第六場二班田草1000米直路賽都唔簡單，皆因來自蔡約翰馬房的三歲優質灰馬「旺蝦王」，再以無敵姿態在最佳拍檔潘頓胯下一放到底，昂然完成服役五戰全勝同程，單Win及組合獨贏A1均派12.5元。
「旺蝦王」於今場直路賽排2檔算衰位，但無礙牠爭勝，很快移往外欄前列第二位，結果末段透出贏1.25馬位，保持不敗。
被馬會列為12匹超新星之一的「旺蝦王」上季由新馬賽起步，今季編入第三班起步，直到今場首戰二班即勝為止，每次皆以優良速度由頭帶到尾，將對手玩弄於鼓掌上，表現充滿王者風範，未來有力成為香港直路賽首席賽駒。
與此同時，養過一代馬王「靚蝦王」的馬主劉錫康亦加添一筆威水史，「旺蝦王」為佢創造個人名下馬首次五連捷，可喜可賀。「蝦妹」劉錫康女兒劉津津，今日身穿一件心口有兩個大紅蘋果的上衣前來撐場，一貫素顏現身，她謂今場有投注「旺蝦王」，好開心可順利取勝。
蔡約翰贏「旺蝦王」後，現以27場頭馬於成績表排第二，咬到以29Win帶頭的徒弟羅富全實一實。
第六場二至四名分別為「百勝龍」、「與龍共舞」及「開心有你」，四重彩派一萬一千幾。三T大彩池冇人中正獎，買中頭兩關可收八萬三千幾安慰獎。