臨近聖誕，大家都想開開心心咁過節，不過西維爾教頭比列素就可能唔多開心。因為球隊喺上周五就決定向呢位早前宣佈患上前列腺癌、但手術成功嘅阿根廷籍教頭開刀，聖誕節前慘食無情雞。
比列素今夏先從另一位阿根廷籍主帥森派奧利手上接過西維爾嘅帥印，當時同球隊簽約兩年。不過，球隊上周三作客皇蘇輸1:3，最近各項賽事已經連續四場不勝，更有半場畀皇家馬德里大數五球嘅劣績。
3:3追和利記最激情
一直有傳言管理層對比列素帶隊嘅成績唔收貨，加上同陣中球員好似中場大將尼桑斯不和等，最終西維爾喺上周五決定炒比列素。主席荷西卡斯特羅話呢個係個艱難嘅決定，但球隊最近嘅成績同表現，令管理層無法唔作出改變。
48歲嘅比列素執教呢半年，最出名當然係有傳佢喺對利物浦嘅歐聯分組賽事，上半場落後三球下，半場時有傳公開自己病情，激勵球員最終追和3:3。不過事後西維爾高層澄清，球員一早就知道比列素患癌，所以只係個美麗嘅誤會。
西維爾管理層預計喺聖誕假期後，新帥就會上任，𠵱家仲係洽談當中，新教練暫時嘅熱門人選有前巴塞教練安歷基，同埋法國名宿、前巴黎教練白蘭斯。西維爾喺今季各項賽事踢咗25場比賽，取得13勝五和七負，現時排喺西甲第五，雖然距離榜首巴塞隆拿13分，但同第四位，打少兩場嘅皇馬只係相差兩分，爭入頭四仍然有望，而且球隊喺西班牙盃同歐聯都未出局，咁樣就炒咗比列素，好似苛刻咗啲喎。