世界上最受歡迎的老人家應該是聖誕老人！4歲來港定居的瑞典人聶安達（Anders Nelsson）是資深音樂人亦是「聖誕老人」，17年前開始探訪孤兒院扮聖誕老人，他保守估計有200、300次。今個聖誕節，本報直擊聶安達扮聖誕老人過程，由穿褲、裝大肚腩、穿鞋着衫黐鬚和化妝，整個過程十分鐘大功告成。
嚇到即閃開
說到扮聖誕老人最難忘經歷，聶安達說：「有次喺廣州一間公司Christmas party，有個50幾歲女士直頭非禮我，伸隻手入我啲衫度話『睇你有乜禮物畀我！』直頭嚇親我呀，影相時佢隻手擺入去……」是否下身重要部位？他說：「係呀！我即刻閃開啦，周圍啲人笑，我費事破壞氣氛嗌非禮叫警察，但唔係幾開心，搞到咁樣，可能佢貪玩，可能飲咗兩杯，睇吓我係咪真嘅男人。」
徒弟贏冠軍
不過，聶安達表示扮聖誕老人多是開心時刻，尤其兩年前他在慈善活動上遇上一位智障人士，令他大為感動。聶安達哽咽說：「佢衝埋嚟攬實我話『聖誕老人我好愛你呀！』我𠵱家諗起都流眼流。」至於另一難忘事，為多前他曾經訓練過一位叫Santa Banana的聖誕老人參加瑞典舉行的世界聖誕老人大賽，結果對方順利贏得冠軍。聶安達更提供心得，建議聖誕老人最好食薄荷糖防口臭，免得小朋友接近時聞到聖誕老人口腔有異味。
採訪：魯吉
攝影：沈健程
場地提供：The ONE