上屆政府嘅問責官員同行會成員，大部份人都有着落搵到新工，但八方估唔到仲有人到近日再申請批准做新工，而咁啱得咁蹺，呢兩個都係前特首梁振英心腹，一個就係中策組前全職顧問高靜芝（圖），另一個係中策組前首席顧問邵善波。
其實佢兩個之前已搵到位落腳，邵善波就去同係「梁粉」嘅恒隆主席陳啟宗有份的「新範式基金會」做執行董事，高靜芝直情去梁振英間「一帶一路」公司做董事。不過前任行政長官及政治委任官員離職後工作諮詢委員會噚日公佈佢哋又有新工，邵善波於本月28日起，做中信改革發展基金會顧問同中國人民大學重陽金融研究院高級研究員，而高靜芝就出任一間叫「一舖清唱有限公司」嘅董事，似乎佢兩個真係好多時間。