今日開始就係一連幾日嘅聖誕假期，就連「好打得」嘅特首林鄭月娥都要趁聖誕假唞唞，同家人北上度假，政府內近一半局長亦趁林鄭藉機休息一下，不過政務司司長張建宗就因為要署任特首無得走開，人人普天同慶佢就要隨時Stand By，真係慘慘豬。
另一個冇得放假嘅司長就係上京列席大常委會會議嘅律政司司長袁國強，不過有傳袁國強1月辭職後需要幾個月時間「過冷河」，所以佢都唔急在一時。
外號「好打得」嘅林鄭上任半年就放咗首個長假，大部份局長都跟風趁聖誕和新年休假。八方發現，創新及科技局局長楊偉雄將會放假19日，返美國探望患柏金遜症、行動不便嘅阿媽。
近半局長跟住唞
發展局局長黃偉綸、教育局局長楊潤雄亦會休假至少10日，下年年頭先會再復工，計計埋埋有成近一半局長藉機休息。財爺陳茂波雖然聖誕冇假放，但嚟緊除夕開始會放一個兩至3日嘅短假期。
盛傳即將離任嘅袁國強冇得放假，不過八方聽聞佢一辭任就要放一個非常長嘅假期，事關佢要幾個月時間「過冷河」先可以私人執業「搵真銀」。咁袁國強之前已經簽訂嘅大律師樓租約咪要白白交租囉，有資深法律界人士就估計，大律師樓會免袁國強幾個月租，佢又話，即使要交租亦無所謂，因為袁國強大把錢喎。
李八方