聖誕節係普天同慶，金絲猴寶寶點可以錯過呢個節日？海洋公園嘅動物護理團隊，近日特別為首隻喺香港誕生嘅本土川金絲猴寶寶「樂奇」準備咗聖誕禮物，慶祝樂奇第一次喺公園同父母過聖誕。
今年4月17日出生嘅樂奇，父母都係來自成都動物園，即係分別喺2015年同2012年加入海洋公園嘅雄性川金絲猴其其同雌性川金絲猴樂樂。已經八個月大嘅樂奇，身體嘅毛髮已經由灰色變成淺棕色，體重亦由6月份嘅一公斤增至兩公斤，相當活潑精靈。
一如小朋友咁，樂奇會模仿父母嘅一啲行為，例如整理毛髮同坐喺木盒上磅重。日漸長大嘅佢開始慢慢戒緊母乳，對嫩枝葉同蔬菜，如紅蘿蔔、甜椒等特別有興趣。充滿好奇心嘅佢最喜歡掛喺樹枝上，仲會跟住父母四圍攀爬。