民建聯一班立法會議員趁聖誕假前殺入工展會shopping，向以開會瞌眼瞓聞名嘅「象哥」黃定光，見到社企賣仙人掌時表現雀躍，話要買嚟送畀黨友葉國謙，何解？象哥話買嚟畀阿謙坐，「我已經好體恤佢（葉），唔擺喺佢張床嗰度，不過我嫌棵仙人掌啲針唔夠長!」阿謙見到黨友「厚待」自己，客氣話棵嘢啱象哥多啲喎，唔知係咪暗示象哥成日眼瞓呢？
象哥其後解釋諗住放棵仙人掌喺阿謙張凳，原因係自己需要「刺激」：「瞌眼瞓嗰個係我，就係咁所以要搵啲刺激嘢，等佢（葉）嘩一聲嘅時候，我就醒嘞！」象哥呢個「提神」方法，真係相當特別。
另一民記議員「元秋」蔣麗芸到場後，就同工展小姐合照，又入貨買金華火腿，仲話諗住遲啲請記者食飯時煮嚟享用喎。