雖然等多幾日，先至係聖誕假，但似乎大家個心，已經飄咗去買咩聖誕禮物、聖誕有乜好去處，又有乜大餐可以同家人朋友擦一番。唔少局長亦已經好有聖誕mood，唔係開P就係去唱聖誕歌，有議員就趁假前夕去工展會濕平，就連海洋公園嘅金絲猴，亦提早收到聖誕大禮，聖誕前夕靈魂出竅，是常識吧！
陳帆靈魂遊走 上京前開P
聖誕假期將至，唔少人個心已經唔喺office，既然仲未放到假，就開下Party等「讓靈魂遊走」，滿足一下！好似運輸及房屋局局長陳帆（梵哥）咁吖，噚日啟程到北京，準備列席人大常委會會議就高鐵一地兩檢議題答問前，都不忘與同事開P，釋放下有繁重工作量嘅同事靈魂！
其實唔少政策局，每年都會自行搞聖誕Party，運房局都唔例外，噚日喺金鐘力寶軒開餐，局內同事聚首一堂慶祝一番。臨上機前嘅陳帆都有出席兼講番兩嘴，例牌菜係多謝同事過去一年努力工作。咁又好正常，因為嚟緊一年繼續打仗，自然要慰勞下同事嘅靈魂與肉身，等佢哋繼續為佢同個局拼搏。
席間唔少得嘅當然係抽獎，同時亦有玩下遊戲，喺冬至前夕，團團圓圓。
李八方