E-Kong（524）前主席、電競公司Nova eSport創辦人楊俊偉（Anthony），自今年12月初起，就俾人喺港島區貼「尋人啟事」，話佢係老千騙子。有報道仲話，好多人都搵唔到Anthony，玩失蹤咁話。
不過，Anthony今日接受《蘋果》電話訪問時，就話事件源於佢基金業務，有客輸打贏要，「我俾人勒索，佢想中傷我，想引起我哋注意，相煩到我哋，咁我就已經報咗警，交咗畀警方處理，搵咗律師，有需要嘅話，律師會做進一步行動。」除咗貼街招外，Anthony仲收到電話滋擾。對於點解之前冇高調澄清，「唔通我大聲講，我俾人勒索咩？」
佢話旗下基金生意，以至其他生意，運作仍然非常健康良好。不過經過今次事件後，佢哋之後收客前，會對客戶背景先進行更深入了解。
至於有報道話佢「玩失蹤」，佢就話，自己根本冇潛過水，「個個都搵到我，好多人都打嚟問候我，連你（記者）都搵到我，我點會係失蹤？」
李華華