【《add》專訪】「人生是充滿選擇，你揀用開心嘅角度去睇，就全日都會開心！」
45歲的陳慧琳多年來樂觀努力，完全幸福女人人辦。2018年Kelly又開始錄歌、可能再開演唱會等，亦是結婚十周年，講起家庭囝囝，Kelly就開心，「我屋企，老公同兩個仔飲食都一樣：Pizza Pizza Pizza ! 兩個仔都算乖啦，我好少鬧佢哋，因為傷喉嚨呀。」結婚十周年也不用刻意慶祝，因為「我每一天都覺得自己很幸福。」
採訪：林妙萍
攝影：郭賢興
服裝提供：Kate Spade New York
場地提供：Sky Garden （California Tower）
陳慧琳和老公劉建浩（Alex）在2008年結婚，她坦言兩公婆最大的幸福來源是一對囝囝：「蝦餃仔」劉昇和「小籠包」劉琛，兩人之間湊仔都非常有默契，經常互相補位。
Hea住長大
Kelly近日回歸工作檔，忙於錄新歌、拍MV，上周又出席Kate Spade New York品牌活動，人靚勤力，台上台下、家庭都打點得滿分，Kelly卻直認自己從來不是有計劃、有目標的人，「其實我由細到大都好hea，好似發緊夢，見步行步嗰類。學生年代，好似乜都唔識咁，好多嘢諗，揀呢科，我唔掂喎，好低分；揀嗰科，我又冇興趣，終於揀大學真係要決定，我就覺得日日對住Art，我可以接受，所以就揀咗Art。」
隨遇而安，卻又幸運行到今天，Kelly於1992年在美國留學認識現時老公，又入行成為歌手，一切上天有安排，「其實我日日都覺得自己好幸福，除咗病嗰陣啦。咁多年，我係遇到好人多過所謂嘅小人，同埋人生真係充滿選擇，你用乜嘢角度去睇一件事，就會有唔同結果，樂觀嘅態度好重要。」
幸運女人Kelly亦很坦白可愛，從不介意分享家庭，Kelly演唱會亦會見到兩個囝囝上台，「蝦餃仔」劉昇已八歲，五歲「小籠包」劉琛亦快升小學。「佢哋兩個算乖，我分析咗，勸佢兩吓，佢哋會聽。我有鬧吓，但把聲好攰，會好傷聲。所以鬧呢部份，就由爹哋做，基本上爹哋喝一聲，全家都靜晒㗎喇。」她又指囝囝大得快，近期愛上rap歌。至於家庭「煮婦」的工作，反而最簡單，「我屋企，包括老公同兩個仔，飲食上係一樣嘢就夠，Pizza！日日都係Pizza、Pizza、Pizza，之後炸雞、Pizza、炸雞、意大利粉，全部西餐。所以我同佢哋去旅行，一定會瘦。」最怕兒子病，因為常被兒子傳染，而自己一年病足五六次。
第一次約會
2008年和Alex結婚，明年結婚十周年紀念，「噚日先同老公傾開，決定唔慶祝，因為我哋好懶，唔想搞，求其喺屋企食餐飯就得。老公話不如搞20周年，我話，吓，我哋好老㗎喎，搞十五周年啦。」兩人愛情長跑十多年才結婚，Kelly至今依然記得兩人的第一次約會，「喺紐約約會，我哋一齊去咗食龍蝦餐，喺香港嘅第一次約會，就去咗皇后戲院睇戲，我都冇扮嘢，冇特登遲到，好準時。」
諗緊學填詞
粉絲等待多時的新專輯，明年面世，Kelly說：「𠵱家不停追歌，追到就錄，暫時一首快歌，幾首慢歌，因為我都想填廣東詞，所以得閒就會諗吓有乜內容。」Kelly的演藝人生少不了經理人鍾珍，一直陪伴在她身邊，更是她心目中的女超人，「Superwoman一定係鍾珍，佢管理成間公司咁大，以前UFO咁多電影，除咗做我經理人，佢仲同時開緊三、四部戲，真係無所不能。」她坦言在鍾珍身上學懂許多做人處事，如何從多角度看待一件事，找到位減壓。
消失的高踭鞋
陳慧琳做了多年型媽，台上依然型格女人味滿分，隨着做了媽咪，心愛的時尚單品也告別衣櫃，「我啲高踭鞋呀，真係唔可以再着，平時去街，兩吋，兩吋半矮矮哋，後來減到一吋半，𠵱家直頭高踭鞋完全唔使買，因為係跑唔到，去旅行就一定波鞋。」至於平日工作買的高踭鞋，Kelly會在每兩年一次的陳慧琳慈善基金義賣時，清倉變作善款。
更多精采時尚內容，盡在 http://add.appledaily.com 。