雖然施蒙尼開綠燈畀基沙文走人，但佢始終仲係馬體會嘅人，要斟介係都等一月先。但巴塞隆拿就等唔切，佢哋嘅高層阿摩（Guillermo Amor）早前爆料，話巴塞主席巴杜美好有可能已經同基沙文傾過計，仲同對方嘅家人接觸過。馬體會梗係唔GUR，佢哋計劃同國際足協告狀，話巴塞非法斟介旗下球員。
據英國BBC報道，好多球會包括曼聯、皇馬、巴塞等等都對基沙文有興趣，但馬體會計劃只係告巴塞，因為巴塞聲稱已經同基沙文身邊嘅人接觸，當中包括佢嘅屋企人。馬體會認為巴塞違反FIFA規定，所以就告狀。
其實巴塞之前試過違規簽買幼齒被禁止買人，最近又因疑似違規斟介甘美奧中場新秀艾法亞美路（Arthur Melo）鬧出風波，隨時一月又畀人落禁令。