西班牙國家打吡一觸即發，喺周六上演，仲要係香港闔家歡時間晚上八點開波。雖然呢場波對落後緊11分嘅皇家馬德里相當關鍵，但剛喺阿聯酋捧完世冠盃返嚟，頭號球星基斯坦奴朗拿度（C朗）就先晒溫馨再備戰，一家六口合照網上曝光，C朗嫂佐真娜仲好吸睛㖭。
張合照係佐真娜放上自己ig，相中C朗、佐真娜同七歲嘅小C朗，手上各捧一個BB，坐喺張梳發上影呢張溫馨家庭照，而阿嫂手上就係佢上月替C朗誕下嘅愛情結晶品Alana，但着上低胸小背心嘅佢，喺呢張相都畀大家覺得佢好「有料」，睇到網民眼定定。
對手巴塞隆拿賽前就先向職球員派禮，每人會喺聖誕收到一部iPhone X，唔知會唔會刺激班球員喺嚟緊國家打吡踢得更落力。不過，球會最近傳出想買基沙文一事，就俾呢位法國前鋒所屬嘅馬德里體育會，指控佢哋非法接觸旗下球員，準備將事件告上去國際足協。