谷中這晚（20日）上半場賽果冷熱兼備，頭場開大熱Win，第二、三場由冷馬贏，到第四場四班1200米開番大熱頭馬，方嘉柏馬房「喜進」夥拍潘頓，人馬連捷於同班同程，今場單Win及組合獨贏A1分別派19.5及16.5元。
「喜進」上次配潘頓輕勝四班谷草1200米開齋，當時抽第4檔，呢次留居四班，多負八磅至130磅，轉排第3檔，賠率得1.9倍，只及上仗3.5倍約一半，贏馬姿態依然輕鬆，一放到底大勝3.5馬位，加分後再出肯定要跑高一班。
方嘉柏馬房近排回勇，12月內枕住有馬贏，近兩次賽事分別勝出「自由旺」及「喜進」，季內累積17Win，升上成績表第四位。而今場「喜進」贏馬後，凱旋門有位起碼六尺高、戴賊仔帽留二撇雞鬍鬚的外籍年輕男子拉頭馬，仿如巨人般。
方嘉柏表示「喜進」一直都有進步，馬兒仍在學習當中，今場排三檔有利，對手亦不算強，但下仗升上三班，對手就截然不同了，希望屆時克服升班壓力。方嘉柏又幽默地說「喜進」喜排內檔貼欄跑，如果排大外檔，可能會飛出大外叠，飛到去馬場內麥當勞快餐店！
潘頓今晚原本手風一般，先後騎頭場「名馬」及第三場「按得澄」出擊做阿二，呢場卒之以「喜進」擔正，個人累積連勝七個賽日未斷纜。
第四場跑出熱頭冷腳，二至四名順序是「必定掂」、「一馬當先」及「獻惑」，四重彩派6,002元，暫時全晚最奀。