聖誕老人一定要圓碌碌？香港本土味嘅聖誕老人似乎唔係呢個look！新地執董郭基煇（Adam）早前同一班完成咗「新地運動行善在校園」計劃嘅小學單車手，一齊到沙田水泉澳邨同基層兒童過聖誕。Adam唔只出席，仲化身聖誕老人同小朋友開P玩遊戲，雖然Adam裝咗個假肚腩，不過整體嚟講都係瘦削版聖誕老人！
上述計劃係新地社區活動系列之一，參與嘅學生會喺專業人員指導下體驗運動樂趣，培養健康生活習慣，而學生累積嘅踩單車里數會轉化成物資，轉贈基層兒童。至今參加計劃嘅學生達2,700人次，共踩咗逾2,800公里，已轉化成書券捐贈畀200位沙田水泉澳邨基層學童。Adam話當日同小朋友過咗愉快一日，希望小朋友長大後繼續有健康體魄並關愛別人。