民建聯立法會議員聖誕前同傳媒聚會，仲好應節咁戴上聖誕頭飾，聖誕樹、聖誕鹿同聖誕車乜都齊，扮鹿嘅陳恒鑌期間更發出「咩咩」叫聲，笑死唔少記者，但都唔及齋坐已似足聖誕老人嘅象哥黃定光搶鏡。除咗民記成員不斷摸象肚皮，搞到象哥都忍唔住大嗌：「喂，你唔好摸！做乜喺度玩老嘢！」仲有民記議員將聖誕披肩放上象哥塊面做假鬚，搞到佢不停俾同事搣塊面。
民記議員其後又同記者玩「有口難言」遊戲，用身體語言表達寫喺卡紙上嘅文字，最搞笑嘅莫過於估「包租婆」三個字時，多名議員齊齊用手指指向元秋蔣麗芸，咁又真係好貼切喎！
而當參加者要估「龍蝦」兩粒字時，身為塘邊鶴嘅元秋知道答案後就搞搞震，最初搞笑話「係隻鹿」，然後嚟料大嗌：「阿梁太」，繼而轉身匿入記者群中，唔通佢都驚會惹來惡果？
李慧琼講議規口窒
民建聯主席李慧琼就話，今年民記嘅聖誕願望包括「減稅鬆一鬆」、「人人住好啲」、「有病唔使怕」、「長者樂悠悠」同「天地有正氣」，其間琼子講到《議事規則》通過後，突然窒一窒，唔知係咪知道嚟緊仲有排煩？
李八方