如果10年前同你講三中堅陣式將會大行其道，你一定會話冇可能，因為當時幾乎隊隊都打緊4-4-2，雙翼齊飛雙箭頭係主流。自從意大利教頭干地（圖）以三中堅帶領祖記、意大利攞到好成績之後，基本上𠵱家個個都跟風，阿仙奴、曼聯、AC米蘭甚至史篤城都跟風。
有云得中場得天下，打三中堅嘅好處就係中場打多兩個人，一對翼衞進可攻退可守，搶中場都易啲。唔似一般左右閘落吓底出吓波咁簡單，三中堅陣式對翼衞嘅要求極大，佢哋要具備良好嘅閱讀球賽能力，又要有一定嘅防守意識，跑上跑落已經係等閒事，好多領隊仲會要求佢哋中場切入，射門能力都要有番咁上下！
成功嘅例子就係車路士，佢哋擁有一隊超強翼衞馬高斯阿朗素同埋域陀摩西斯，二人上季合共攻入九球貢獻五個助攻，場均造出1.5個攔截，造就車仔上季奪冠。但現今球壇好翼衞難求，祖記嘅列治史迪拿、曼聯嘅路爾斯華倫西亞、艾舒利楊格都年過三十，遲多幾年都應該會退下火線。
有人會話哥拉辛拿斯、班捷文文迪、馬高斯阿朗素呢啲後生又質素高嘅翼衞，所以三中堅有排玩。對於呢個說法筆者絕對認同，但講嚟講去又似乎得呢幾個見得大場面，而好多球隊都試過改做翼衞，阿仙奴就擺比利連去右翼衞，早年前利記領隊羅渣士都試過擺馬高域打右翼衞，但兩個都係識攻唔識守，表現仲衰過以前。所以話搵好翼衞難，改造翼衞更難，三中堅陣式未必可以長玩。
文：聰鳴