天寒地凍，喚起社區對老人家的關注！但這晚（20日）谷中低溫下跑夜馬，老人老馬卻很醒神，頭場五班1000米，由現役全港次老（45歲）騎師杜利萊策八歲馬「要風得鋒」勝出。此駒隸屬高伯新馬房，今場1檔起步，沿欄一放到底大熱掄元，單Win及組合獨贏A1分別派41及29元。
「要風得鋒」由資深馬主陳有悅與陳昌海持有，兩人之前聯名養過在港九捷自購馬「御鋒」，曾經風光一時。
「要風得鋒」本身健康唔係太穩定，有唔少傷患紀錄，如流鼻血、骨裂、不良於行等，對上一次贏馬已是14年1月5日由梁家俊勝出田草1200米，距今接近四年。
呢晚「要風得鋒」藉1檔之利，沿用慣常的放頭跑法，末段雖被潘頓操刀的九歲馬「名馬」追到氣咳，但「要風得鋒」仍能直領到底贏短馬頭位，人馬可謂交足功課。
高伯新表示「要風得鋒」不太受鞭，一打就放慢，不肯展步，所以他一早已經吩咐杜利萊盡量少用鞭，最好不要打，結果杜利萊減少用鞭，是今仗取勝關鍵。
頭場開出由「要風得鋒」與「名馬」組成的17歲老馬連贏，派彩255元，三、四名分別落在四歲「做得好」及七歲「樂家將」身上，四重彩派一萬九千幾，賽果可以話係老馬天下。