咩叫人逢喜事精神爽？靚仔騎師梁家俊在今晚（20日）谷中第五場四班一哩作出最佳示範，佢重新接手高伯新旗下「贏科超影」，留前鬥後一擊即中，個人近六次賽事五次有馬贏。「贏科超影」增程初跑一哩爆大冷開齋，單Win及組合獨贏A3分別派349.5及29元。
剛周日（17日）尾場梁家俊不小心策騎大灰獸「平湖之星」，被判下周三（27日）起停賽兩期，直至明年1月7日星期日沙田日馬至可以復出，佢因此跑埋本周六（23日）沙田日賽，今年就冇得再上陣。
今晚是梁家俊2017年最後一戰谷中夜馬，結果爆冷勝出「贏科超影」，此匹體重僅999磅之馬，沿途守包尾位置，直路一下子彈上逢馬過馬，贏0.5馬位，梁家俊下月初榮升父親，今晚正好為自己預先送上賀禮，兼且季內齊頭贏了20場賽事。
高伯新表示「贏科超影」贏在梁家俊出色的發揮，他指梁家俊的留放功夫，是香港現役騎師中最出色的一位，此駒上場配史卓豐形勢不利，早段未能留住放了出來，今仗梁家俊留得到，加上跑一哩最合，遂順利取勝，並指這匹三歲愛爾蘭自購馬仍在進步中，加分後仍可望交出好表現。
高伯新這晚冷熱照贏，頭場以大熱「要風得鋒」先建一功，第四場憑冷馬「贏科超影」再下一城起孖，打開馬房12月勝利之門，季內增至10場頭馬，贏多六場就達到續牌指標。
第五場二至四名依次是「上浦福滿」、「川河領駒」及「埼豐」，四重彩派12萬幾。