政界流傳律政司司長袁國強即將辭職，重操大狀故業搵真銀，但佢一直冇正面回應。噚日袁國強出席立法會小組委員會前，又俾傳媒追問係咪已交辭職信，佢只係話呢個階段冇補充；面對大批傳媒窮追，佢重申冇嘢補充，只係叫大家小心，「我驚你哋跌親」，「大家以安全為重，因為聖誕節嘞，唔好整親」。
問到幾時公佈辭職消息？佢話：「我諗我做完我要做嘅嘢先啦，好唔好啊？」，笑指若唔能夠準時開會，可能會俾委員會主席鬧：「畀我入去飲杯咖啡先啦，唔該咁多位，Merry Christmas！」
袁國強即將同運房局長陳帆同保安局長李家超啟程到北京，喺周五列席人大常委會嘅分組審議會議，屆時會討論高鐵西九站一地兩檢合作安排議案，意味特區「三步走」踏入第二步。