今屆人大選舉最耀目男新人，首推政制及內地事務局前局長譚志源，成場選戰由頭帶到落尾，事實上佢都好勤力，除咗親自向選委打電話拉票，各組織選舉論壇幾乎逢請必到，噚日前政制局中人，包括兩位前副局長黃靜文同陳岳鵬，及曾任政制事務局助理秘書長嘅前AO黎淑禎，更加到場合體為前波士打氣，譚志源最終以1,580票勝出，得票率約88%，36人中排中游！
陳岳鵬去向保密
查實譚志源唔係首位前高官闖進人大選舉戰場，上屆選舉保安局前局長李少光都一鳴驚人，下海首仗就有1,387票，得票率約為93.2%，僅次於得票率達94.3%嘅立法會議員廖長江，戰績勁過譚志源。
曾任廉政專員嘅李少光當年話，想將香港廉政制度向內地推廣，唔知佢任期內有乜成成果？譚志源呢次接棒上陣，唔通偏向虎山行，想向內地推動香港立法會直選嘅選舉模式？而離開政府後去咗哈佛大學讀碩士嘅陳岳鵬，今次趁聖誕假返港出席朋友婚宴，趁勢亦為譚志源助選，料會留港兩星期；問到5月畢業後有乜打算？佢話遲吓再公佈！
李八方