港人對極小小小圈子嘅港區人大選舉，好自然係不感興趣，但對於建制中人嚟講，卻係好大件事，邊36人脫穎而出，絕對有啟示，所以建制選舉會議成員幾忙都盡量唔缺席，以免選唔出阿爺心目中嘅理想人選。
身為選舉會議成員嘅藝人周星馳、曾志偉、汪明荃、以及李嘉誠等，噚日一早到場，首度出戰嘅鄺美雲同陳曼琪等，則着到紅噹噹，唔通預示會當選？除咗主持選舉嘅現任特首林鄭月娥，前3任特首包括官司纏身嘅曾蔭權，亦有打煲呔現身並投票。現場成為各人自拍熱點，今年9月出席建制派集會時語出驚人、話對港獨人士必須要「殺」嘅屏山鄉事委員會主席「高佬和」曾樹和，亦同當日附和指「無赦」嘅立會議員何君堯言談甚歡，仲開心自拍，高佬和仲同曾鈺成及曾德成兄弟合照㖭。