出席人大選舉會議嘅成員噚日除咗要選出36位人大，開波前仲要以舉手方式選出主席團推薦嘅袁武擔任總監票人及21位監票人。有監票人話除咗投票期間幫手，其後檢查選票冇損毀，簽名封箱後就完成任務。
查實佢哋做啲乜未必重要，反而邊啲人獲「欽點」肩負重任更重要！八方發現當中有唔少民建聯區議員如陳學鋒等，亦有新民黨陳家珮同工聯會鄧家彪，咁啱兩位分別擬代建制出戰港島同新東補選，而疑似喺九西出選嘅民建聯鄭泳舜都上榜。據聞獲「欽點」者喺西環圈獲高度信任，同黨派無關。近年開始活躍於親中政團嘅觀瀾湖集團主席兼行政總裁朱鼎健，以及兩位建制派專業界別組織新寵，IT界女將李煥明同測量師林力山等亦上榜；日後有乜作為，備受注目！