參加聖誕酒會，近日係平常事，逢此場合，必定係人頭湧湧，點頭朋友見得多，熟朋友就可能見到一打左右，大家碰吓酒杯，飲番半啖白酒、紅酒，跟住就拜拜。嗰日見到一位新相識，估唔到佢話有事討教，左丁山連聲話冇資格教人，但卒之一齊走出酒店，去最嘈吵，可能最冇人得閒聽你兩個講嘢嘅星巴克再傾多幾句。
所謂討教，左丁山開宗明義話已退出顧問行業，不再做乾收眼，新朋友N夠晒醒目咁話：「咁我地唔講公事嘞，不如傾吓閒偈，分享對大市嘅觀察。」又好啫。朋友N原來在美國名校畢業，出身名牌大投資銀行，在大中華地區有過一番投行事業，現在就做上市公司主席，唔怪得好似乜都識，對現時市場狀況比左丁山update好多。於是問佢：「香港股市成日話有北水南來，好似北水救港，冇北水唔得咁樣，香港會否遲早成為上海阿二，失去世界金融中心地位？」朋友N話：「一定唔會，香港成為金融中心，由左先生你地嗰代開始，我呢一班人係接班人，唔會失禮你地，失去江山嘅。我在大中華地區打滾多年，對兩岸公司上市都比較熟，大膽啲講，台灣最唔爭氣，全無進步，以前現在同埋以後都係金融backwater，唔駛理，蔡英文上台後，民進黨恐陸心理已經到失常地步，成日查問投資者資金來源有無陸資成份，股東有冇大陸機構或大陸人，麻煩到極點。譬如平保現在披露持有滙控5%，咁滙控在台灣嘅貸款，是否違規呢？台灣金融監管局過份緊張，被國際投資者笑死。」
「上海呢，中共控制中國，黨與國都要控制金融不出亂子，規矩多多，但又容許有辦法有關係之人半遮半掩咁違規，令外資冇啖好食，總之在黨政不分，黨規大於國法嘅環境下，上海永遠得唔到國際金融機構之充份信任，傾到最尾還是要在香港根據香港法律辦事。只要香港法治不死，香港冇可能比上海超越金融中心地位。」假如香港法治大陸化，沿着王志民王振民嘅講話路線走呢？朋友N話：「咁就自作孽不可活，到時我返美國退休咯。」唉，佢原來有美國護照，唔怪得講說話大聲啲，中環有不少朋友N呢類人，自小讀國際學校，入美國Ivy League，出身投資銀行，自己苦學普通話，遊走大中華地區搵銀，與左丁山呢類本地薑嘅思維不盡相同。好彩佢地仍然對香港有「故鄉感情」，出於感情或現實需要，肯為香港金融中心地位打拼。