新世界又想幫大學畢業生上車，屯門新盤THE PARKVILLE按揭最長還款期40年！真係人生有幾多個10年呀，嘩，計一計，一踏出大學道門，22歲買樓，供到62歲，人生絕大部份時間，都要為地產商打工做死一世。就算未來忽然有錢銀需要或者收入下跌，希望延長供樓還款期，相信相當困難。做40年按揭，首先要身體好、份工長做長有！
講樓價跌，唔少人會話，美國加息都唔跌，確實，近年唔少有樓人士都選擇轉按，拎返筆現金出嚟用吓，分分鐘放喺定期都有錢賺。再者，樓價升絕對唔使供咁耐，不過，層樓首5年有禁售禁租期，供完5年後有幾個大問號，未來樓價同買樓之時有無升？就算有升，按揭仲有流流長35年，有無銀行肯承接轉按呢？前排先講緊大學生月入中位數20年跌5.5%，大手加人工、跳槽又追唔追到利息升幅？以往有銀行願意做30年以上按揭，通常對象係有長俸嘅公務員。
2012年樓價開始大升，上車首期增加，已經有地產商推出過40年按揭計劃，但係金管局即刻出手禁止，仲首次硬性規定按揭年期上限規定不得高於30年。當年係2012年9月，當時金管局副總裁阮國恒話，當月有5%按揭申請年期高於30年，情況已經係「非常態」，令當局擔心。
2012年全年中原城市指數只係90以上，今時今日已經爆升75%去到近160，咁𠵱家地產商擺明再推40年按揭，出到咁絕，當然係一手樓市小貓三四隻，要谷一谷啦，咁唔知金管局又點睇呢？
Melody
Fb.com/whichroad