臨近年尾，炒股意欲大減，要獲利的、要持有的都做好決定，眼下最需要解決的難題，可能不是花多少錢買股票，而是花多少錢買聖誕禮物？
今年股市暢旺，大家對股市的關注度高咗，另一半自然覺得今年份禮都會大咗，甚至可能話「你買幾手騰訊（700）都十幾萬啦，一萬幾千買個包包唔過份吖」。
首先，買騰訊有機會獲利之餘，就算買貴咗都可以當「撥備」，但買了包包就鐵定要「撇賬」；不過，送了包包也可能有數字上難以量度的回報，所以這個比喻又未必公平。然而，假設在今年最高位（439.6元）買3手騰訊，以截至上周五收389元計，即賬面蝕了大約15,000元。以此推論，即係你女朋友同你講，「你年年聖誕買騰訊摸頂都唔過份吖」，嘩，真是心都寒一寒。
其實，有「錢」買股票不代表有「錢」買禮物的。這個時候，可能一眾巴打都會話「大佬呀，你唔好咁痴線啦，頭先講嗰啲嘢已經激到佢哋好嬲喇」。
近年社會提倡增加被動收入，而最簡單直接的方法就是建立一個投資組合。「錢」用作購物之餘，另一重要角色就是轉化成投資來提高收入，故兩者應有所區分。打個比喻，一間公司若將其搵錢業務賣掉後盡派特別息，當然會有一時的快感，但公司前景就會削弱了。因此，作為衡量消費的標準，不應看手上的本金或股票的價值，而應該看獲得的盈利。
另一樣要注意的是，賬面上的盈利一日未變現，都只是紙上富貴。筆者舉一個較極端的例子，近年樓市向好，有業主滿心歡喜資產升值，但最後「使大咗」要加按物業，雖則不致於按爆煲，但陷入「供樓輪迴」之中，這又何苦？其實，不少中產業主都面對着一個殘酷現實，在供樓壓力下，實際購買力或許比不少公屋富戶還要低，但當然，供滿之後便是真正屬於自己的資產。
越講越遠，其實筆者只是想指出，不要被紙上富貴和節日氣氛所影響，認清自己的購買力，避免衝動消費。回應番文章首段，只要獲利的、持有的都做好了決定，心中有了數，在今年股市豐收年之下，加碼送上聖誕禮物給摯愛亦很合理。
註：以上言論僅供參考，並不代表筆者真實行為。佳節當前，女朋友心情可急升亦可急跌，買禮物前應理解當中之風險。完。
http://fb.com/lokastock
盧卡股