泥地賽的勝負關鍵，好多時視乎場地情況。好像這天（17日）沙田第三場五班1200米泥地賽，明顯場地完全冇得追，方嘉柏馬房「自由旺」在韋達胯下一放到底爆大冷Win，單Win及組合獨贏A3分別派274及33元。
4歲澳洲自購新馬「自由旺」今仗賽前曾9戰，最叻攞過3次季軍而未勝；前仗此駒正是由韋達初跑泥地，於1200米快跟下直路潰散。
所以今次「自由旺」第二次跑泥地，亦是1200米及韋達，加上11檔欠佳，受冷落正常，但一出閘不久韋達力騎透出切入後，放得甚順，相反直路後上馬卻舉步維艱，明顯場地不利追，結果「自由旺」放到贏1.75馬位，打開服役勝門。
「自由旺」爆27倍Win，此駒是方嘉柏、韋達自今年3月1日贏「傾心星」後，相隔9個多月後，另一場合作頭馬。不過今場賽後只見方嘉柏和兒子Ryan拉頭馬，未見馬主梁松山及親友。
第三場第二至四名順序為「駕迅」、「天賜寶」及「踏雪名駒」，四重彩派43,050元。