沙田馬場這天（17日）第八場三班1600米六福珠寶盃，羅富全馬房五歲新西蘭自購馬「大眾精英」，於法國騎師巴度胯下爆冷打開在港勝門，單Win及組合獨贏A3分別派211及32元。
「大眾精英」是巴度今季首場盃賽頭馬，賽後由藝人林峯頒獎，這天林峯面容似有點疲倦，雖然頹look不過仍成為焦點所在，引來大批傳媒拍攝，而無綫女藝人劉溫馨，亦有為「大眾精英」拉頭馬。
「大眾精英」來港前在澳洲五戰兩冠一亞兩殿，贏過1500及1600米各一次，本身來港後於11月8日初出，在谷草1200米由郭能跑第六，本來本月3日在沙田1400米作第二戰，但因賽前一日晨課期間曾走脫，因而退出。今趟復出換巴度轉田草加程至1600米，結果留前鬥後沿途居中下，末段以勁勢殺出重圍，贏一個馬位，在港首次上名即爆21倍Win開齋。
巴度上周三（13日）在谷中起冷孖，今場係佢季內首勝沙田賽事，馬上有盃落袋，賽後笑到四萬咁口，至於羅富全累積28場頭馬領先練馬師榜，暫時拋離排第二的師傅蔡約翰四Win。
第八場冷門當道，二至四名依次是「環保動力」、「飛星凱旋」及「太聰明」，四重彩派115萬幾，暫為全日最冷。
今場蔡約翰馬房、雷神莫雷拉座騎1.5倍「平海福星」大熱倒灶跑第八，單係獨贏、位置已合共輸咗約2,200萬投注額，連埋Ｑ等彩池，馬迷約輸4,000萬在此駒身上。