馬圈有種賽駒叫忠心好馬，今午（17日）沙田最尾第十場跑出的頭二馬，正是最佳寫照。
第十場二班1400米，由一對新勝馬包辦連贏，當中冠軍「平湖之星」及亞軍「奮鬥雄心」都係著名忠心好馬。其中容天鵬馬房「平湖之星」在梁家俊胯下塞都塞唔死，大熱連捷榮膺季內四捷首駒，單Win及組合獨贏A1分別派29.5及16.5元。
體重高達1336磅的五歲大灰獸「平湖之星」，上季出道一戰跑第二，今季5歲大爆發，越跑越進步，今仗沿途守內欄前列位置，塞足逾半條直路以為必敗，怎料臨尾撬開一個窄位竄上，三幾步間即追過數駒，戲劇性反先贏0.5馬位，睇到馬迷目定口呆。
「平湖之星」至今累積六戰四冠二亞全入Q，本身不斷成長進步，最新評分肯定突破100分大關，前途無可限量，絕對具級際賽分量。
靚仔騎師梁家俊是「平湖之星」固定配搭，今季佢可謂事業騰飛，既憑「美麗傳承」於香港一哩錦標首勝一級賽，亦一手替「平湖之星」完成四捷，為香港運動員爭光不少。
第十場跑第二的是同樣新勝的「奮鬥雄心」，此駒上仗由李寶利於三班1400米爆出86倍大冷Win。
呢次跑高一班配搭照舊，結果後上與「平湖之星」串成81倍新勝馬冷Q。三、四名分別為「怪獸家長」及「信心保證」，四重彩派六萬二千幾。