香港大學醫學院成立130周年，噚晚喺灣仔會展搞咗個大型晚宴，超過3,500人出席，名醫雲集，連朝早搞完第3次集思會嘅特首林鄭月娥都有嚟主禮切餅祝酒，全國政協副主席梁振英都係座上客。林鄭致辭時除咗祝賀醫學院，亦乘機大sell政策，話會就醫管局撥款作出改變，又會增加資源改善公立醫院擠迫問題。
晚宴有好多精采節目，包括由超過50位醫學生主演嘅音樂劇，呢套音樂劇由著名音樂人趙增熹監製，透過多首經典流行曲，唱出醫學院130年以來嘅成就，結尾仲大合唱佢為醫學院130周年特別創作嘅《杏林遍地》。
講番朝早嘅娥班子朝10晚4集思會特別之處，係局長同副局外，仲有埋政治助理聚首，除咗外訪中嘅商經局長邱騰華等，40幾人齊齊整整首度碰頭，林鄭仲搵嚟負責改組中策組嘅羅志康解構新中策組職能。