港台節目《城市論壇》噚日討論《議事規則》，民主黨劉慧卿同「西環契仔」謝偉俊期間就立法會組成問題擦出火花！話說卿姐喺席間提及立法會有一大班功能組別議員，部份係零票當選，部份就得百幾票，相反民主派喺直選嘅票數多但議席少，入到議會一投票，一定輸畀保皇黨，問題就在於議會組成不公。
但選過旅遊界功能組別嘅謝偉俊就話，其實參選功能組別唔係容易，仲話零票當選係因為當選者能擺平業界各方勢力，「零票當選係非常之難」，仲挑戰卿姐叫佢試吓選功能組別。連選7屆立法會直選未輸過嘅卿姐，一聽到就好㷫，因為竟然有人夠膽叫佢選佢鬧足幾十年嘅功能組別，即時向謝偉俊反挑機：「我唾棄嘅嘢（功能組別）我去選？你都黐線……我有咁得閒選你嗰啲功能組別？我選過7屆直選，未輸過呀！謝偉俊，我幾時同你選過（直選）都得。」